Муборизаи гӯштингирони тоҷик дар Алмаато

Душанбе, 24 январ. (АМИТ “Ховар”, Ситора Раҷабова).- 25-ум ва 26-уми январи соли равон дар шаҳри Алмаатои Қазоқистон мусобиқаи байналмилӣ миёни мардон ва занон дар ду намуд самбои варзишӣ ва самбои размӣ барои ба даст овардани ҷоизаи Президенти ин кишвар Нурсултон Назарбоев доир мегардад.Дар мусобиқаи мазкур беш аз 350 гӯштингир аз 17 кишвари ҷаҳон — Арманистон, Беларус, Булғористон, Гурҷистон, ИМА, Қазоқистон, Қирғизистон, Молдова, Муғулистон, Озарбойҷон, Олмон, Русия, Руминия, Тоҷикистон, Туркманистон, Ӯзбекистон ва Украина иштирок ва миёни ҳам барои ба даст овардани ҷоизаи мусобиқа қувваозмоӣ менамоянд. Тоҷикистонро дар ин мусобиқа 14 гӯштингир дар намуди самбои варзишӣ байни мардон таҳти раҳбарии мураббӣ Фарҳод Раҳматуллоев намояндагӣ мекунанд.