Намоиши аксҳои Шӯҳратҷон Ёров дар Олмон

Душанбе, 30.01.2014.(АМИТ «Ховар», Сабоҳат Қадамова)-Аз 22-юми январи соли равон дар шаҳри Берлини Олмон аксҳои Шӯҳратҷон Ёров таҳти унвони «Тоҷикистони ман» ба маърази тамошо гузошта шуд, ки он то 5-уми феврал идома меёбад.
   Намоиши мазкур бо ибтикори Муассисаи давлатии сафарию ҳунарии «Базморо», Сафорати Ҷумҳурии Тоҷикистон дар Олмон ва Ҷамъияти дӯстии Тоҷикистону Олмон баргузор мегардад. Дар ин намоиш зиёда аз 80 акси ин суратгир пешкаши тамошобинони олмонӣ гардонида мешаванд, ки бахшҳои таърихӣ, фарҳангӣ, чеҳраҳо ва манзараҳои дилфиреби Тоҷикистонро фарогиранд.
   Бояд ёдовар шуд, ки намоиши аксҳои Шӯҳратҷон Ёров дар кишварҳои Туркманистон, Покистон, Болорусия, Русия ва Салтанати Уммон низ ба намоиш гузошта шудааст.