Рушди картошкапарварӣ дар Фархор

Фархор, 9 январ. (АМИТ «Ховар», С. Холов).-Дар асоси «Барномаи давлатӣ оид ба рушди соҳаи картошкапарварӣ дар Ҷумҳурии Тоҷикистон барои солҳои 2012-2016» бо мақсади таъмини амнияти озуқавории кишвар ва зиёд намудани истеҳсоли картошка соли равон дар хоҷагиҳои ноҳияҳои минтақаи Кӯлоби вилояти Хатлон мувофиқи дурнамо бояд дар майдони 215 гектар кишти картошка гузаронида шавад. То имрӯз аллакай дар майдони беш аз 135 гектар кишти хушсифати картошка гузаронида шудааст. Бо истифода аз боду ҳавои мусоид дар хоҷагиҳои деҳқонии ноҳияи Фархор кишти картошка идома дошта, аз 60 гектари дурнамо хоҷагидорон дар майдони 36 гектар кишт гузарониданд. Хоҷагидорон ният доранд бо тавсияи олимони соҳа кишти картошкаро мувофиқ ба қоидаҳои агротехникӣ ба анҷом расонанд.Дар хоҷагиҳои ҷамоати деҳоти Дарқади ноҳияи Фархор дар баробари дигар бахшҳои соҳаи кишоварзӣ аз ҳисоби картошкапарварӣ хоҷагидорон даромади хуби иқтисодӣ ба даст меоранд. Соли гузашта ҳосилнокии картошка дар аксар хоҷагиҳо ба 250 сентнерӣ расонида шуд.