Соли 2013 ҳаҷми МММ 40,5 млрд сомониро ташкил дод

Душанбе, 15 январ. (АМИТ “Ховар”). – “Соли 2013 дар натиҷаи амалисозии барномаҳои рушди иқтисодӣ ва чорабиниҳои пешбинишуда нишондиҳандаҳои макроиқтисодӣ тадриҷан афзоиш ёфта, ҳаҷми маҷмўи маҳсулоти дохилӣ (ММД) беш аз 40,5 миллиард сомониро ташкил дод, ки ин нишондиҳанда нисбат ба соли 2012-ум 7,4 фоиз зиёд мебошад”, — гуфт Президенти Ҷумҳурии Тоҷикистон Эмомалӣ Раҳмон 15 январ дар маҷлиси ҷамъбастии Ҳукумат. Вай афзуд, ки дар ин муддат сатҳи таваррум паст гардида, ба 3,7 фоиз баробар шуд, ки дар натиҷа устувории қурби асъори миллӣ таъмин гардида, нархҳо дар бозори истеъмолӣ дар ҳолати муътадил қарор доштанд. Ҳамзамон бо ин, нақшаи пешбинишудаи буҷети давлатӣ дар соли 2013 пурра таъмин шуда, ин омил ба пурраву сари вақт маблағгузорӣ шудани бахши иҷтимоӣ, аз ҷумла пардохти саривақтии маошу нафақа мусоидат намуд.