Судяҳоро ҳам суд мекунанд

Душанбе, 13 январ. (АМИТ «Ховар», Муқаддас Кушакова).-Дар нишасти матбуотие, ки имрӯз бо иштироки раиси Шӯрои адлия Зафар Азизов, мушовири калони Президенти Чумҳурии Тоҷикистон оид ба сиёсати ҳуқуқӣ С. Шоҳназаров, кормандони дастгоҳи Шӯрои адлия ва намояндагони воситаҳои ахбори омма баргузор шуд, зикр гардид, ки соли сипаригардида ба дастгоҳи Шӯрои адлия 3056 мавод ворид шудааст, ки аз ин 1258- тоаш арзу шикояти шаҳрвандон буда, 1238 адади он ҳал шуда ва 20 адади дигар мавриди баррасӣ қарор дорад.  Зимни нишасти матбуотӣ ҳамчунин зикр шуд, ки судҳои шаҳру ноҳияҳои ҷумҳурӣ дар фаъолияти худ ба як қатор муваффақиятҳо ноил гаштанд. Аз ҷумла, 50 нафар судя бо раҳматнома ва ифтихорномаҳои соҳавӣ ва 8 нафар бо мукофотҳои давлатӣ сарфароз шуданд. Зафар Азизов, раиси Шӯрои адлия дар ҷавоб ба саволи мухбири АМИТ «Ховар» гуфт, ки мутаассифона, дар баробари пешравиҳо баъзе аз судяҳо ба камбудиҳо низ роҳ медиҳанд. Масалан, соли гузашта 5 нафар судя бо парвандаи хусусияти коррупсионӣ дошта ба ҷавобгарии ҷиноятӣ кашида шуда, бо муҳлатҳои гуногун аз озодӣ маҳрум гардиданд.