«Тоҷикстандарт» озмоишгоҳҳои ташхисиро аз нав барқарор кард

Душанбе, 20 январ. (АМИТ «Ховар», Муқаддас Кушакова).- Зимни нишасти матбуотӣ директори Агентии стандартизатсия, метрология,сертификатсия ва нозироти савдо Бахтиёр Шукуров гуфт, ки самти амалӣ намудани назорати давлатӣ ҷиҳати таъмини сифат ва бехатарии маҳсулот васеъ гашта, дар шаҳри Ваҳдат ва ноҳияи Данғара марказҳои ташхисии минтақавӣ таъсис шуданд. То ба ин давра 20 адад озмоишгоҳи ташхиси молу маҳсулот дар Агентии “Тоҷикстандарт” ва марказҳои зертобеъ таъсис ва ба истифода дода шуданд. Таҷҳизоти озмоишгоҳҳои агентӣ, бахусус, озмоишгоҳҳои ташхиси маҳсулоти хӯроквории дастгоҳи марказии Агентии “Тоҷикстандарт” ва марказҳои вилоятии “Тоҷикстандарт” дар Суғду Хатлон ба талаботи стандарти байналмиллалӣ мутобиқ дониста шуданд. Бо назардошти ин, дар соли 2012 се озмоишгоҳи ташхисии “Тоҷикстандарт” (Душанбе, Хуҷанд, Қурғонтеппа) аз тарафи ташкилоти олмонии «DаkKS» ва Маркази миллии аккредитатсияи Ҷумҳурии Қазоқистон, ки дар миқёси Осиёи Миёна ягона мақомоти салоҳиятдор оид ба аккредитатсияи озмоишгоҳҳо мебошад ва аз тарафи Ташкилоти байналмилалӣ оид ба ҳамкориҳо дар соҳаи аккредитатсияи озмоишгоҳҳо (ILAC) ваколат гирифтааст, аккредитатсия шуда, ваколати байналмилалиро соҳиб гашт. Ин озмоишгоҳҳо дар Ҷумҳурии Тоҷикистон ягона озмоишгоҳҳое ба шумор мераванд, ки ваколати мазкурро соҳиб гаштаанд. Умуман, тайи ду соли охир дар озмоишгоҳҳои ташхисӣ 23 усули нави ташхиси молу махсулот ҷорӣ карда шуд.