Тозагӣ ҳам маданият аст

Душанбе, 22 январ.(АМИТ «Ховар», Муқаддас Кушакова).- Ибодзода Хайрулло, ки роҳбарии Кумитаи ҳифзи муҳити зисти назди Ҳукумати Ҷумҳурии Тоҷикистонро ба уҳда дорад, зимни нишасти матбуотӣ ба хабарнигорон изҳор дошт, ки соли сипаригардида бо мақсади ҳифз ва аз партовҳо тоза нигоҳ доштани маҳалҳои аҳолинишин ва соҳили дарёву каналҳо амалиёти умумиҷумҳуриявии «Тозагии маҳал» ва «Тозагии соҳил» гузаронида шуд. Аз рӯи маълумот дар амалиёти мазкур бештар аз 184 ҳазор нафар сокинони маҳал, донишҷӯён ва кормандони ташкилоту корхонаҳо иштирок намуданд. Дар натиҷа бештар аз 1 ҳазору 152 километр соҳили дарёҳо, каналҳои магистралӣ, обанборҳо, ҷӯйборҳо ва манбаъҳои дигари обӣ тоза гардида, зиёда аз 7 ҳазору 370 метри мукааб партовҳои гуногун ба партовгоҳҳои расмӣ бароварда шуданд. Вай ҳамчунин афзуд, ки ҳамаи 41 шабакаи давлатии обуҳавосанҷии баландкӯҳ бо маводи ғизоӣ, либосҳои махсус, ангишт ва сӯзишвории дизелӣ таъмин шуд. Барои аз фасли зимистон солим баровардани ҳайвоноти ваҳшӣ ва парандагон гузаронидани корҳои биотехникӣ идома дорад.