6 сокини ВМКБ наметавонад ба Русия равад

Душанбе, 27.02.2014. (АМИТ «Ховар», Лайло Тоирӣ).- Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар ВМКБ ҷиҳати огоҳ намудани шаҳрвандоне, ки пас аз бозгашт дубора ба Федератсияи Русия сафар кардан мехоҳанд, корҳои таблиғотию фаҳмондадиҳӣ мебарад. 
 Бо истифода аз маълумоти электронии Хадамоти Федеролии муҳоҷирати Русия, кормандони Раёсат дар давоми ду ҳафта 78 нафар муроҷиаткунандаро  барои муайян сохтани ихроҷ аз  қаламрави Федератсияи Русия санҷиданд. 
 Зимни ин санҷишҳо маълум гардид, ки 6 нафар барои вайрон намудани қонунгузории Федератсияи Русия ба муддати се сол ҳуқуқи ба ин кишвар ворид шуданро надорад.
Бо ҷорӣ шудани чунин низоми кор, ҳар рӯз ба ин раёсат аз 10 то 15 нафар шаҳрванд тавассути телефон ё ба таври шифоҳӣ барои пайдо намудани маълумот пеш аз сафар муроҷиат менамояд.