Дастгир шудани шаҳрванди ҶИА бо маводи мухаддир

Душанбе, 25.02. 2014. (АМИТ «Ховар»).-Тайи рӯзҳои охир аз ҷониби кормандони милитсия дар натиҷаи гузаронидани чорабиниҳои фаврӣ-ҷустуҷӯӣ дар якчанд минтақаи ҷумҳурӣ чор нафар бо гумони даст доштан дар гардиши ғайриқонунии маводи мухаддир дастгир  шуданд.
Тавре ки сомонаи расмии Вазорати корҳои дохилии ҶТ хабар медиҳад, дар ҳудуди ноҳияи Хуросон сокини шаҳри Қурғонтеппа Тоҷимурод Ҳайдаров, соли таваллудаш 1991 бо 7 килою 760 грамм маводи нашъадори ҳашиш дастгир шуд. Дар вақти кофтукови шахсии сокини ноҳияи Рӯдакӣ Саидаслам Тоҷиддинов, соли таваллудаш 1976, аз ӯ 270 грамм маводи нашъадори афюн дарёфт ва мусодира шуд. Ҳангоми бурдани чораҳои фаврии иловагӣ муайян гардид, ки дастгиршуда маводи мазкурро аз як сокини дигари ҳамин ноҳия Эмомалӣ Мухаков, соли таваллудаш 1952 харидааст.
Ҳамчунин зимни гузаронидани чорабиниҳои фаврӣ дар ноҳияи Ишкошим шаҳрванди Ҷумҳурии Исломии Афғонистон Улфатшо валади Салим, соли таваллудаш 1986 дастгир  шуд, ки ҳангоми кофтукови шахсӣ аз ӯ 605 грамм маводи нашъадори ҳашиш дарёфт ва мусодира  шуд.
Аз рӯи далелҳои мазкур бо моддаи 200 қисми 4 КҶ Ҷумҳурии Тоҷикистон парвандаи ҷиноӣ оғоз гардида, тафтиши пешакӣ идома дорад.