Дастури Қ. Расулзода оид ба рушди варзиш

Душанбе, 22.02.2014 (АМИТ «Ховар», Фарзонаи Давлат).-Дирӯз дар ҳузури Сарвазири мамлакат Қоҳир Расулзода ҷаласаи навбатии Шўрои тарбияи ҷисмонӣ ва варзиш дар назди Ҳукумати Ҷумҳурии Тоҷикистон баргузор гардид.
Дар ҷаласа рафти иҷрои қарорҳои ҷаласаи Шўрои мазкур  аз моҳи ноябри соли 2011, масоили маблағгузории соҳаи варзиш дар Тоҷикистон, ҳавасманд намудани ғолибон ва ҷоизадорони мусобиқаҳои варзишӣ, омодагӣ ва иштироки варзишгарони тоҷик дар мусобиқаҳои байналмилалии варзишӣ дар солҳои 2014-2016, ҳамчунин тайёрӣ ба баргузории Чемпионати ҷаҳон оид ба таэкван-до (ИТФ) байни наврасон дар Тоҷикистон мавриди баррасӣ қарор дода шуд.
Тавре таъкид гардид, роҳбарияти Ҳукумати мамлакат ба масоили рушди варзиш таваҷҷўҳи рўзафзун зоҳир намуда,  барои  варзишгарон давра ба давра  шароити зарурии  машқу тамрин фароҳам оварда мешавад. Вобаста ба ин, аъзои Шўро ва роҳбарони дигар вазорату идораҳои дахлдори мамлакат вазифадор гардиданд, ки иҷрои ҳатмии дастуру супоришҳои Сарвари давлатро, ки дар мулоқот бо варзишгарони мамлакат баён гардидаанд, саривақт таъмин намоянд. 
 Қоҳир Расулзода оид ба оммавӣ гардонидани варзиш дар миёни ҷомеа,  таъмиру таҷдид  ва бунёди иншооти замонавии варзишӣ,  тайёрӣ ва иштироки варзишгарон дар Бозиҳои 31-уми олимпӣ дар Рио-де-Жанейро (соли 2016), Бозиҳои 2-юми олимпӣ байни наврасон дар Нанкин (соли 2014) ва Бозиҳои варзиши Осиё дар Инчхон (соли 2014) ба роҳбарони вазорату идораҳои дахлдор дастуру супоришҳои мушаххас дод.
Ҳамчунин барои иҷрои Барномаи рушди футбол барои солҳои 2012-2014 ва оммавӣ гардонидани ин намуди варзиш, Барномаи рушди варзиш ва тарбияи ҷисмонӣ ва дар сатҳи баланди омодагиҳо гузаронидани Чемпионати ҷаҳон оид ба таэкван-до (ИТФ) байни наврасон, ки чунин чорабинии варзишии сатҳи баланд бори нахуст  дар Тоҷикистон баргузор мегардад, дастуру супоришҳо  дода шуд.