Дидори «Равшан» бо «Сувайк» дар Ҷоми АФК

Душанбе, 07.02.2014 (АМИТ «Ховар», Ситора Раҷабова).-Дастаи «Равшан»-и Кӯлоб дар дидори  нахустинаш дар бозии гурӯҳии Ҷоми АФК-2014 бо тими «Сувайк»-и Уммон рақобат мекунад.
Тавре ки дар ин бора сомонаи ФФТ хабар додааст, дастаи «Сувайк» дар даври аввали плей-оффи Лигаи қаҳрамонҳои АФК дар майдони худ аз тими «Ал-Қудсия»-и Кувайт бо ҳисоби 0-1 шикаст хӯрд ва акнун дастаи «Сувайк» дар даври гурӯҳии Ҷоми АФК-2014 бо дастаи «Равшан», қаҳрамони дукаратаи Тоҷикистон мубориза мекунад. 
  Гуфта мешавад, ки бозиҳои гурӯҳи «А» рӯзи 25-уми феврал дар варзишгоҳи «Сиб Стэдиум»-и Масқат баргузор мешаванд. Дар даври дуввум «Равшан» дар майдони худ 11-уми март бо «Сафо»-и Лубнон вохӯрда, дидори сеюмаш низ дар хона 18-уми март бо тими «Зат Рас»-и Урдун барпо мегардад.