Донишҷӯёни англисзабон- шунавандагони озоди забони форсӣ

Душанбе, 14.02.2014. (АМИТ «Ховар», Лайло Тоирӣ).-Ба муносибати 21-умин солгарди таъсиси Қувваҳои Мусаллаҳи Ҷумҳурии Тоҷикистон ҳафтаи равон дар Донишкадаи ҳарбии Вазорати Мудофиа дар мавзӯи «Таълими кӯтоҳмуддати забонҳо ва таъсири он ба истилоҳоти забони давлатӣ» мизи мудаввар доир гардид.
Дар нишасти илмӣ афсарону устодон, донишҷӯён ва намояндагони ҳарбии артишҳои ҷумҳуриҳои Ҳиндустон, Дания ва Британияи Кабир иштирок доштанд. Бояд гуфт, ки тӯли ду моҳ донишҷӯёни англисзабон дар Донишкадаи ҳарбии Вазорати мудофиа ба ҳайси шунавандаи озоди забони форсӣ дар ҷараёни машғулиятҳо иштирок дошта, нозукиҳои зиёди ин забонро аз худ карданд. Ҳамин тавр, маърӯзаҳои илмии меҳмонон ва чанде аз дигар донишомӯзони ин боргоҳи илм доир ба роҳу усулҳои омӯзиши забони хориҷӣ ва паҳлӯҳои гуногуни забони адабии тоҷик шунида шуданд.
Ҳадаф аз баргузории ин гуна чорабиниҳои илмӣ миёни намояндагони низомии хориҷи кишвар ва донишҷӯёни муассисаҳои таълимии ҳарбӣ, пеш аз ҳама, сайқал додани донишҳои тахассусӣ ва таҳкими муносибатҳои дӯстонаи байналмилалӣ мебошад.