Фурсати кам барои кишт

Душанбе, 25.02.2014.(АМИТ «Ховар», Зарангези Латиф).- Дирӯз раиси вилояти Суғд Абдураҳмон Қодирӣ ба ноҳияи Бобоҷон Ғафуров сафари корӣ анҷом дода, бо иштироки раисони ҷамоатҳо, сарварони ассотсиатсияҳои хоҷагиҳои деҳқонӣ ва масъулини сохторҳои дахлдор ҷаласаи корӣ баргузор намуд. Аз хадамоти раиси вилоят хабар доданд, ки дар ҷаласа иҷрои Қарори раиси вилоят доир ба ислоҳоти замин мавриди таҳлилу баррасӣ қарор гирифт. Мувофиқи нақша  бояд 148 хоҷагии калон тақсим шавад. Дар ин замина 9109 саҳмдор барои ташкили 4150 хоҷагии оилавию инфиродӣ муроҷиат кардааст. То имрӯз пас аз интишори қарор ҳамагӣ 763 хоҷагии нав ташкил ёфта, 3387 ариза ҳанӯз баррасӣ нашудааст.
Раиси вилоят роҳбарияти ноҳия, раисони ҷамоатҳо ва масъулини дахлдорро барои кашолкорӣ дар иҷрои қарори мазкур интиқод карда, супориш дод, ки раванди таҷдидро дар муҳлати кӯтоҳтарин пурра амалӣ намоянд, зеро то мавсими нави кишт фурсати кам  мондааст.