«Мавҷи назм»-озмун

Турсунзода, 26.02.2014. (АМИТ «Ховар», Ҳотами Шариф).- Дар шаҳри Турсунзода озмуни шеъри беҳтарин таҳти унвони «Мавҷи назм» баргузор гардид. Дар маҳфил хонандагони муассисаҳои таҳсилоти миёнаи умумӣ, омӯзгорон, ашхоси касбу кори гуногун шеърҳои иншонамудаи худро қироат карданд.Мавриди зикр аст, ки дар шаҳри Турсунзода бо сарварии шоир Абдуқаҳҳори Қосим маҳфили адабии «Ворисони Турсунзода» амал менамояд, ки теъдоди хеле зиёди кӯдакону наврасон ва калонсолонро дар бар мегирад. Ҷамъомади навбатии аъзои маҳфили «Ворисони Турсунзода» бо ширкати шоирони шинохта Хайриддини Хайрандеш, Қосимҷон Зарифӣ, Саид Раббонӣ, Кӯҳзоди Фатҳулло, Ҳасанбой Ғоиб ва дигарон хеле шавқовар ва хотирмон ҷараён гирифт. Барои эҷоди шеъри беҳтарин ба аъзои маҳфил ифтихорнома ва туҳфаҳои хотиравӣ супорида шуд.