Мусобиқаи тирандозӣ миёни сарбозон

Душанбе, 20.02.2014 (АМИТ «Ховар», Фарзонаи Давлат).- Имрўз дар толори варзишӣ-тирандозии Кумитаи марказии Ташкилоти мададгори мудофиаи кишвар мусобиқаи тирпарронӣ миёни сарбозони қисмҳои ҳарбии мақомоти қудратӣ баргузор гардид. 
Дар чорабинӣ дастаҳои варзишии Вазорати мудофиа, Сарраёсати қӯшунҳои сарҳадӣ, Горди миллӣ, Қӯшунҳои дохилӣ, Кумитаи ҳолатҳои фавқулода, Бригадаи 6593-и Сарраёсати иҷрои ҷазои ҷиноятӣ иштирок намуда, миёни ҳам барои ба даст овардани ҷоизаи Кумитаи ҷавонон, варзиш ва сайёҳии назди Ҳукумати Тоҷикистон рақобат карданд. 
Ғолибони чорабинӣ бо диплому туҳфаҳои кумита пагоҳ, 21-уми феврал дар Маркази фарҳангии ҷавонон «Ориёно», ки дар ин ҷо бахшида ба Рўзи Артиши миллӣ маҷлиси тантанавию фарҳангӣ бо иштироки масъулини кумита,  афсарону сарбозони мақомоти қудратии кишвар доир мегардад, сарфароз хоҳанд шуд.