Мусобиқоти ҷумҳуриявӣ аз рӯи 10 намуди варзишӣ

Душанбе, 19.02.2014 (АМИТ «Ховар», Фарзонаи Давлат).-Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон аз рӯи 10 намуди варзиш миёни наврасону ҷавонон дар се марҳила мусобиқот оғоз хоҳад кард.
Тавре ки дар ин бора аз Кумитаи ҷавонон, варзиш ва сайёҳӣ хабар доданд, марҳилаи аввали мусобиқа даҳаи дуюми моҳи март дар сатҳи шаҳру навоҳӣ, марҳилаи дуюм моҳи апрели соли равон дар шаҳри Душанбе, минтақа ва вилоятҳо, марҳилаи сеюм ва ниҳоӣ дар моҳҳои  май-июни соли равон аз рӯи  гӯштини миллӣ, юнонию румӣ, тарзи озод, самбо, дзюдо, бокс, таэквандо (ВТФ), баскетбол, волейбол ва варзиши сабук баргузор мегардад.
Гуфта мешавад, ки ғолибон ва ҷоизадорони чорабинӣ дар вазн ва масофаҳои алоҳида аз рӯи намудҳои варзиш бо диплому медал ва ҷоми мусобиқа сарфароз хоҳанд шуд.