Мусодираи маводи мухаддир

Душанбе, 18.02.2014. (АМИТ «Ховар»,  Лутфия  Эшонзода).- Кормандони  мақомоти  ҳифзи  ҳуқуқ беш  аз   10  килограмм  маводи  мухаддирро  мусодира  намуданд. 
 
Тавре  ки  аз  Вазорати  корҳои  дохилии  ҶТ  ба  АМИТ «Ховар»  хабар  доданд,  дар  ҷараёни  чорабиниҳо  дар  ҳудуди  ҷумҳурӣ  чор  нафар   шаҳрвандони   кишвар бо   гумонбарии  қочоқи  маводи  нашъаовар  дастгир  шуданд.
 
Аз  ҷумла,  кормандони  милиса сокини   ноҳияи  Рӯдакиро  дастгир  намуда,  аз  номбурда  6  килограмму  300  грамм  ҳашишро   мусодира  карданд.
 
Як  нафар  сокини  ноҳияи  Ёвон   дар  ҳудуди   ноҳияи  Шомансури  пойтахт  дастгир  шуда,  аз  ӯ  2,5  килограмм  ҳашиш  мусодира  гардид.
 
Миқдори  умумии  маводи   мусодирашудаи  мухаддир  10  килограмму  371  граммро  ташкил дод. 
 
Аз  рӯи  ҳодисаҳои   зикршуда  парвандаҳои  ҷиноӣ   кушода шудааст.