Мутахассиси беҳтарини табъу нашр

 
   Душанбе, 27.02.2014. (АМИТ «Ховар», Ҳотами Шариф).-Олими ҷавони тоҷик Дилшод Равшанов баъди бомуваффақият ҳимоя намудани рисолаи номзадӣ дар мавзӯи «Асоснок намудани ҳаҷму бузургии таҷҳизот барои коркарди маводи қолабшавандаи полиметрӣ» аз шаҳри Маскав ба Ватан баргашт. Ӯ муддати 3 сол дар Донишгоҳи давлатии полиграфии шаҳри Маскав ҳамчун унвонҷӯ дар мавзӯи мазкур тадқиқоти илмӣ мебурд.
Мавриди зикр аст, ки Дилшод Равшанов соли 2012 дар конфронси байналмиллалӣ, ки дар он намояндагони 120 донишгоҳи бонуфузи ҷаҳон ширкат доштанд, дар мавзӯи «Тамоюли рушди монотехнологиву пленарӣ дар заминаи таҷҳизоти муосири полиграфӣ», «пайвастшавии қабатҳои нозуки патронҳои полиграфӣ» сухан гуфт. Маърӯзаи ӯ аз беҳтарин кори илмӣ дониста шуда, дар китоби дастаҷамъии конфронс нашр ва худи ӯ бо мукофоти баланд қадрдонӣ гардид.
Дар айни ҳол Дилшод Равшанов яке аз нахустин мутахассисони унвондор дар соҳаи табъу нашр дар ҷумҳурист.