Оқибатҳои барфи зиёд бартараф мешаванд

Кӯлоб, 13.02.2014. (АМИТ «Ховар», Сулаймони Хол).- Бориши барфи зиёд ва сардии ҳаво дар ҳафтаи гузашта кори кормандони соҳаи коммуналиро душвор намуд. Дар ин рӯзҳо кормандони муассисаҳои давлатии нигоҳдории роҳҳо, муассисаҳои ободонию кабудизоркунӣ ва шабакаҳои барқӣ навбатдории шабонарӯзи ташкил намуда, роҳҳоро аз барф тоза ва ҳаракати мунтазами нақлиётро таъмин карданд. Ба иттилои Субҳон Усмонов, сардори ситод оид ба ҳолатҳои фавқулода ва мудофиаи граждании шаҳри Кӯлоб як қисми сокинони ноҳияи Кӯлоб ва хоҷагиҳои деҳқонӣ аз бориши зиёди барф хисорот диданд. Дар ҷамоати деҳоти Зиракии ноҳияи Кӯлоб боми фермаи хоҷагии деҳқонии «Бахт» ва боми корхонаи коркарди пахтаи «Зарҳам» низ фурӯ рафт ва мутахассисон зарари аз офати табиӣ расидаро ҳисоб доранд.Дар баъзе мавзеъҳои ноҳияи Кӯлоб баландии барф то 70 сантиметрро ташкил медиҳад.