Пешниҳоди электронии эъломияҳои андоз

Душанбе, 06.02.2014 (АМИТ “Ховар”, Фарзона Ашӯрмадова).- Имрӯз дар Муассисаи давлатии “Китобхонаи миллии Тоҷикистон” доир ба тартиби бо шакли электронӣ пешниҳод намудани эъломияҳои андоз аз даромад ва вазъи молумулкӣ аз ҷониби хизматчиёни давлатӣ семинар  баргузор гардид. 
Тавре ки дар ин бора аз Кумитаи андози назди Ҳукумати Ҷумҳурии Тоҷикистон хабар доданд, дар семинар намояндагони дастгоҳи иҷроияи Президент, Маҷлиси миллӣ ва Маҷлиси намояндагони  Маҷлиси Олӣ, Шўрои адлия,  Суди Олӣ, Суди Олии иқтисодӣ, Прокуратураи генералӣ, вазорату кумитаҳои давлатии кишвар, мақомоти иҷроияи ҳокимияти давлатӣ дар шаҳри Душанбе ва ноҳияҳои он иштирок намуда, ҷиҳати дар сатҳи баланд ба роҳ мондани ин тартиби хизматрасонӣ таклифу дархост ва пешниҳодоти худро иброз доштанд.
Мақсад аз баргузории чорабинии мазкур ташаккули Ҳукумати электронӣ дар Тоҷикистон ва ҳамзамон ба саҳми мақомоти давлатие, ки тибқи қонунгузории Тоҷикистон уҳдадории пешниҳоди эъломия оид ба андоз аз даромади хизматчиёни давлатиро доранд, расонидани тартиби истифодаи пешниҳоди электронии эъломияҳо мебошад.