Суди сайёр дар қисмҳои низомӣ

Хоруғ, 12.02.2014. (АМИТ «Ховар», Файз Мирасан).-Дар тӯли сол  дар  гарнизони ҳарбии Хоруғ   13 парванда баррасӣ шуда,  ягон  парванда дар марҳилаи  кассатсионӣ ва назоратӣ  бекор нашуд, ки ин аз  беҳтар шудани  сифати   баррасии парвандаҳо   дар марҳилаи аввали судӣ  шаҳодат медиҳад. 
Ба гуфтаи сардори  Суди гарнизони ҳарбии Хоруғ  Дилшод Сангов  дар натиҷаи баррасии  13 парванда нисбат ба 14  сарбозон ва  афсар  бо ҷурми вайрон кардани қонунҳои мухталиф ҳукми  судӣ бароварда шудааст.   
Додгоҳи ҳарбии гарнизони Хоруғ   бештари мурофиаҳои судиро ба таври сайёр бевосита  дар ҳудуди  қисмҳои ҳарбӣ баргузор кардааст.  Ба гуфтаи  раиси  Суди ҳарбии гарнизони Хоруғ  ин иқдом  ба хотири  таъсирнокии бештари  мурофиаҳои судӣ  ва ҷилавгирӣ аз қонуншиканиҳо байни афсарону сарбозон дар қисмҳои ҳарбӣ  амалӣ мешавад. 
       Ҳамзамон дар ин муҳлат ба Суди Олӣ  19 дархости мақомоти Прокуратураи  ҳарбӣ ворид  гардида,  ҳамаи ин дархостҳо  дар муҳлати муайяншуда қонеъ гардонда шуданд. Ба манзури  тарғиби   таҳкими қонуният, ҷалавгирӣ аз муносибатҳои ғайриоинномавӣ  ва сафарбар намудани  ҷавонписарон ба хизмати Ватан аз ҷониби  Суди ҳарбии гарнизони Хоруғ   18 вохӯрӣ ва суҳбатҳо дар мавзуъҳои гуногун бо сокинони вилоят ва сарбозону афсарони қисмҳои ҳарбии ҳудуди вилоят гузаронда шуданд.