Таваҷҷуҳи Р. Раҳимов ба ҳолати беҳдоштӣ

Душанбе, 27.02.2014. (АМИТ «Ховар»).- Вазири корҳои дохилӣ Рамазон Раҳимов аз Маркази таълимии Сарраёсати Хадамоти давлатии оташнишонӣ ва баталйони 1-уми таъйиноти махсуси қисми ҳарбии 5453 Раёсати Қӯшунҳои дохилии ВКД дидан карда, бо фаъолияти хизматии онҳо аз наздик ошноӣ пайдо кард.
Тавре ки сомонаи расмии ВКД хабар медиҳад, дар ҷараёни сафар мавсуф оид ба таъмирталаб будани маркази тадқиқотӣ ва ошхона таъкид намуда, баҳри таъмир намудани онҳо раёсатҳои дахлдорро вазифадор сохт.
Вазири корҳои дохилӣ ба баталйони 1-уми таъйиноти махсуси қисми низомии 5453-и Қӯшунҳои дохилии ВКД омада,  зимни боздид бо афсарону сарбозони қисми мазкур ҳамсуҳбат шуд ва ба ҳолати санитариву беҳдоштии сарбозон таваҷҷуҳ зоҳир кард.
Ҳамзамон барои обутоби ҷисмонии сарбозон ва сохтани боз ду толори варзишӣ ба масъулини дахлдор дастуру супоришҳо дод.
Дар ин вохӯрӣ вазири корҳои дохилӣ баҳри ободонию сарсабз гардонидани атрофи қисми низомӣ тавсия дод, ки маъракаи ниҳолшинониро хуб ба роҳ монда, ба муҳити атроф  зебоии бештареро зам намоянд.