Зариф Ализода: 47 дарсади муроҷиатҳо оид ба ҳуқуқи кӯдак аст

 
Душанбе, 07.02.2014 (АМИТ «Ховар», Фарзона Ашӯрмадова).- Ҳифзи ҳуқуқҳои гурӯҳҳои осебпазир ва кӯдакон яке аз самтҳои афзалиятноки мақомоти Ваколатдор оид ба ҳуқуқи инсон мебошад ва агар дар соли 2012 дар самти ҳуқуқ ба робитаи оилавӣ ҳамагӣ як ариза ба қайд гирифта шуда бошад, дар соли сипаригашта дар ин самт ба мақомоти мазкур 9 муроҷиат ворид гаштааст, ки 47 дарсади муроҷиатҳо оид ба ҳуқуқи кӯдакро ташкил медиҳанд, гуфт Зариф Ализода, Ваколатдор оид ба ҳуқуқи инсон дар Тоҷикистон зимни нишасти хабарӣ ба ВАО.
Ба иттилои Зариф Ализода, вазъи ҳуқуқии муҳоҷирони меҳнатӣ ва аъзои оилаи онҳо яке аз масъалаҳои мубрами рӯз мебошад. Вайроншавии ҳуқуқҳои меҳнатии шаҳрвандони Тоҷикистон дар хориҷи кишвар дар мавридҳое ба вуҷуд меояд, ки муҳоҷири меҳнатӣ вазъи ҳуқуқии ба танзим даровардашуда надорад, дар вазъи ғайриқонунӣ қарор дорад ва муносибатҳои меҳнатӣ аз  тариқи дахлдор бо роҳи бастани шартномаи меҳнатӣ ба расмият дароварда нашудаанд ва ба миёнаравҳо бовар мекунанд, дар натиҷа онҳо ба ҳолатҳои истисморкунӣ, аз ҷумла  сари вақт пардохт нагардидани ҳаққи меҳнат ё умуман пардохт нашудани он дучор мешаванд, иброз дошт Зариф Ализода дар нишаст.