100 стипендия барои донишҷӯёну аспирантон

Душанбе, 3.03.2014. (АМИТ «Ховар», Зарангези Латиф).- Аз 28 феврали соли ҷорӣ Қарори раиси вилояти Суғд  «Дар бораи муқаррар намудани стипендияи раиси вилояти Суғд барои соли 2013 — 2014» тасдиқ гардид.
Мувофиқи қарори мазкур дар соли хониши 2013 -2014 барои донишҷӯёну аспирантони фаъоли муассисаҳои таҳсилоти олӣ ва миёнаи касбии вилоят стипендияҳо таъсис дода хоҳанд шуд.
Тавре ки аз хадамоти матбуоти раиси вилоят хабар доданд, донишҷӯёни курсҳои 2, 3 ва 4, ки аз фанҳои таълимӣ 75 фоиз баҳои аъло доранд, аз тариқи ғолибият дар озмун метавонанд стипендияҳои раиси вилоятро дарёфт намоянд.
Зикр мешавад, ки дар соли хониши 2013 — 2014 барои донишҷӯён ва аспирантон 100 стипендия муқаррар  шудааст.