Қарзҳои дастрас аз «Фонди дастгирии соҳибкорӣ»

Душанбе, 10.03.2014. (АМИТ «Ховар»). — Ҷаласаи навбатии Шўрои нозирони Муассисаи давлатии «Фонди дастгирии соҳибкорӣ»-и Кумитаи давлатии сармоягузорӣ ва идораи амволи давлатии Ҷумҳурии Тоҷикистон чанде қабл баргузор гардид. 
Дар ҷаласа бо назардошти имкониятҳои молиявии Муассисаи давлатии «Фонди дастгирии соҳибкорӣ» ва ба талаботи қарзгирӣ ҷавобгў будани лоиҳаҳо ба баррасии Шўро 9 лоиҳаи аз нигоҳи иқтисодӣ афзалиятнок пешниҳод гардид. Ба  4 лоиҳаи ҶДММ “Сорбон” ноҳияи Восеъ, соҳибкори инфиродӣ Мусоев Ҳ. ноҳияи Восеъ, ҶДММ “Сафари Мурод” ноҳияи Қубодиён ва ҶДММ “Зиёратшо” н.Ванҷ тибқи овоздиҳӣ ба маблағи 2 миллиону 230 ҳазор сомонӣ афзалияти иқтисодӣ дода шуда, протоколи ҷудо намудани маблағҳои қарзӣ ба имзо расонида шуд.
Мавриди ёдоварист, ки Муассисаи давлатии «Фонди дастгирии соҳибкорӣ» ҷиҳати тақвият бахшидани рушди соҳибкории хурду миёна дар Ҷумҳурии Тоҷикистон бо дастгирии бевоситаи Президенти мамлакат Эмомалӣ Раҳмон таъсис шуда, ҳадаф аз таъсиси он ба роҳ мондани дастгирии воқеии давлатии фаъолияти субъектҳои соҳибкорӣ, ҳавасмандгардонии онҳо дар корҳои созандагию бунёдкорӣ, пешниҳод намудани қарзҳои хурду миёна бо фоизҳои муносиб, инчунин таъмини рақобатнокии низоми қарздиҳии бонкӣ мебошад.
Ба Муассисаи давлатии “Фонди дастгирии соҳибкорӣ” дар соли сипаригашта 153 лоиҳа ва дар 2 моҳи соли ҷорӣ 22 лоиҳаи тиҷоратии аз нигоҳи иқтисодӣ афзалиятноки субъектҳои соҳибкорӣ ворид гардидааст.