Ҷилои тозаи «Ҷило- 2014»

 
Душанбе, 05.03.2014. (АМИТ «Ховар», Руқияи Боймамад). — Дар нишасти хабарие, ки дирӯз дар Душанбе бо ибтикори ТВ «Сафина» баргузор шуд, лоиҳаи «ҶИЛО» баррасӣ шуд. Мақсади  баргузории озмун саҳмгузорӣ дар рушди фарҳанг ва ҳамгироии бештари форсизабонон мебошад.
Дар нишаст гуфта шуд, ки овозхонҳои афғон Фарҳоди Дарё, Амирҷон Сабурӣ ва  Ясмина Алидодова  меҳмони ин барнома  хоҳанд шуд. 
Лутфулло Давлатов, директори Муассисаи давлатии  телевизиони “Сафина” ибрози назар карда гуфт: «Аз миёни 200 довталаб то имрӯз  36 нафар барои иштирок дар озмуни “ҶИЛО”дар ин феҳрист  роҳ ёфтаанд».
Аъзои комиссияи назоратӣ  12 нафарро дар бар мегиранд, ки бевосита аз болои лоиҳаи мазкур ва иштирокдорони озмун ва аз болои худи овоздиҳӣ назорат мекунанд. 
Дар ин лоиҳа 12 бахш ҷой дода шудааст: беҳтарин сарояндаи сол,  беҳтарин сарояндаи зан, беҳтарин суруди сол, беҳтарин клипи сол,  беҳтарин намоиши театрӣ,  беҳтарин ҳунарпешаи сол(мард), беҳтарин ҳунарпешаи сол(зан), беҳтарин барномаи телевизионӣ, беҳтарин радиожурналисти сол, беҳтарин радиобарномаи сол, беҳтарин ТВ журналисти сол ва оҳанги Шарқ. 
Озмуни мазкур то моҳи апрел давом хоҳад кард .