8 март борон мешавад ё барф?
Душанбе, 06.03.2014. (АМИТ «Ховар», Кристина Эрлих).- Рӯзи иди 8 март дар Тоҷикистон ҳаво абролуд шуда, дар водиҳо каму беш борон борида, дар кӯҳсор имконияти ба барфи тар табдил ёфтани борон вуҷуд дорад. Шамол пагоҳирӯзӣ дар як сония 2 – 4 метр ва рӯзона 0 – 1 метр мевазад. Дар шаҳри Душанбе ҳарорати ҳаво рӯзона 15 дараҷа гарм мешавад.
Тавре ки аз Хадамоти ҳавосанҷии Тоҷикистон ба АМИТ «Ховар» хабар доданд, 9 ва 10 март вазъи ҳаво тағйир намеёбад.
7 март дар водиҳо ва минтақаҳои кӯҳсор борон борида, ҳарорати ҳаво рӯзона дар вилояти Хатлон 14 — 16 дараҷа, дар вилояти Суғд 10 — 12 , дар ноҳияҳои тобеи марказ 11- 13 дараҷа ва дар шаҳри Душанбе 14 — 15 дараҷа гарм мешавад.