8 нафар — довталаби Ҷоми АИТ
Душанбе, 12.03.2014. (АМИТ «Ховар», Раъно Нусратуллозода).- Аз миёни беш аз 100 нафар довталаби ҷоизаи Ҷоми Академияи илмҳои Тоҷикистон 8 нафар донишҷӯёни Донишгоҳи давлатии Хуҷанд ба номи академик Бобоҷон Ғафуров аз факултаҳои мухталиф барои иштирок ба даври ниҳоӣ роҳ ёфта, ба шаҳри Душанбе сафарбар гардид.
Тавре ки сардори Раёсати таълими донишгоҳ Саидқаҳҳор Ёқубов иттилоъ дод, донишҷӯёнро ду нафар устодони соҳибтаҷриба: доктори илмҳои математика, профессор Абулқосим Мӯҳсинов ва номзади илмҳои химия Муҳиддин Сабуров роҳбаладӣ менамоянд.
Бояд гуфт, ки аз 12 то 14-уми марти соли ҷорӣ беш аз сад нафар донишҷӯи кишвар барои дарёфти Ҷоми Академияи илмҳои Тоҷикистон байни ҳам қувва меозмоянд. Барои иштирок дар ин олимпиада ҳудуди 150 нафар донишҷӯ аз донишгоҳҳои мухталифи кишвар байни ҳам сабқат мекунанд. Иштирокчиёни олимпиада ба ғайр аз дарёфти Ҷоми фахрии Академияи илмҳо бо дипломҳои Академияи илмҳо низ мукофотонида хоҳанд шуд ва дар сурати ғолиб омадан метавонанд бидуни озмун ба аспирантура ва магистратураи Академияи илмҳои ҷумҳурӣ роҳхат бигиранд. Ин олимпиада оид ба фанҳои илмҳои дақиқ, аз қабили физика, химия, математика, таърих, биология, астрофизика дар бинои Академияи илмҳои кишвар гузаронида мешавад.