Бинои мактаби нави № 8 дарҳои худро боз мекунад

Душанбе, 13.03.2014. (АМИТ «Ховар», Екатерина  Пасторова).- «18  март  дар  шаҳри Душанбе маросими  ифтитоҳи  расмии  бинои  нави  мактаби миёнаи  №8  баргузор  мегардад. Роҳбари   раёсати маорифи  пойтахт  Ҳамидуллохон  Фақеров  дар  ин бора ба  АМИТ «Ховар» хабар  дод.
 
Ба  гуфтаи  Ҳамидуллохон  Фақеров, бинои нави  мактаб барои  1354 нафар  хонандагон  дар  як  баст  пешбинӣ  шуда, дар он  ба таври  умум  1652  нафар  мактабиён  таҳсил  мекунанд. 
 
Қобили  зикр  аст, ки  сохтмони  иншооти  навро Ҷамъияти  масъулияташ  маҳдуди  «Тоҷ — Сохтмон Байналмилал» бо  фармоиши Раёсати сохтмони  асосии шаҳри  Душанбе ба  ӯҳда  дошт. Меъмори  боистеъдоди  ҷавон Шаҳноза  Раҳматуллоева лоиҳаи  мактаби  нави  иборат  аз шаш  болокро  офаридааст. 
 
Мактаби нав ҳамчунин китобхона,  студияи  хореография  ва  драматургия, толори  санъати тасвирӣ ва  сураткашӣ  дорад.