«Борбад ва Рӯдакӣ: идомат ва умумият дар анъанот»

Душанбе, 03.03.2014.(АМИТ «Ховар», Марзия Саидзода).-«Борбад ва Рӯдакӣ: идомат ва умумият дар анъанот», таҳти чунин унвон нашриёти «Дониш»-и Академияи илмҳои ҷумҳурӣ китоби донишманди шинохтаи тоҷик Аскаралӣ Раҷабовро аз чоп баровард.    Китоб бо забони  русӣ  мунташир гардида, аз муқаддима ва ду боб — «Борбад ва рушди санъати мусиқию ромишгарии тоҷикон дар қарнҳои  VI -VII»,   «Рӯдакӣ  ва ташаккули анъанаи шеъру мусиқӣ  дар асрҳои IХ -Х» иборат аст.
                Маҷмӯаи мазкур ба омӯзиши нозукиҳои осори пурғановати шахсиятҳои барҷастаи олами шеъру мусиқии тоҷикон дар ду давраи таърихӣ  — аҳди Сосониён (222/24-651) ва Сомониён (819-1005) дар симои нобиғаҳои  бузурги тамаддуни тоҷикон -Борбади Марвазӣ (589/90- 628) ва қофиласолори назми тоҷик Абӯабдуллоҳи Рӯдакӣ (858-941)  бахшида шудааст.  Дар робита ба ин дар китоб ба раддабандии давраҳои таърихӣ ва силсилабандии фарҳанг ва мусиқии классикӣ, нақш ва мақоми хунёгар Борбад ва падари шеъри форсӣ-  Рӯдакӣ дар ташаккули низоми давлатдорӣ таваҷҷуҳи махсус дода шудааст.
                Китоб барои доираи васеи хонандагон, коршиносони бахши фарҳанг, санъатшиносон, мутахассисоне, ки ба пажӯҳиши таърихи  шеъру мусиқии тоҷикон ва Шарқи Миёнаю Наздик машғуланд, тавсия дода мешавад.