Чкалов: Ҷалби беш аз 350 наврас ба касбомӯзӣ

Душанбе, 14.03.2014.(АМИТ «Ховар», Зарангези Латиф).- Дирӯз дар бинои шуъбаи маорифи шаҳри Чкалов маҳсули эҷоди муҳассилини Маркази таҳсилоти иловагии шаҳр ба маърази тамашо гузошта шуд.
Тавре  ки сарвари марказ Хосият Бобоева иттилоъ дод, ҳоло дар ин марказ беш аз 350 нафар хонандагони муассисаҳои таълимӣ  ба касбомӯзӣ фаро гирифта шуда, ба онҳо 12 нафар омӯзгорони соҳибтаҷриба дарс мегӯянд. Дар ин марказ маҳфилҳои “Рассомӣ”, ”Дӯзандагӣ”, ”Забони русӣ”, “Навозандагӣ” ”Мухбирони ҷавон”, ”Рӯзгордорӣ” ва ба монанди ин чандин маҳфили дигар амал менамоянд. Дар самти дӯзандагӣ 15 нафар хонанандаи макотиби миёна бо таҷҳизоти дӯзандагӣ таъмин буда, ба омӯзиш фаро гирифта шудааст.
Ёдрас мекунем, ки дар қаламрави шаҳри Чкалов дар айни замон 2 гимназия, 1 литсей ва 4 мактаби таҳсилоти миёнаи умумӣ, 2 маркази таҳсилоти иловагӣ ва 1 маркази таълимӣ-истеҳсолӣ ҳамчунин мактаби Президентӣ барои хонандагони лаёқатманд бо фарогирии 830 нафар ва мактаб-интернати махсусгардонидашудаи вилоятӣ бо фарогирии 136 нафар тарбиятгиранда фаъолият менамояд.