Дар соҳили дарё маводи мухаддир дарёфт шуд

Душанбе, 22.03.2014. (АМИТ «Ховар», Муқаддас Темурзода).- Кормандони милитсия ду далели ғайриқонунии маводи мухаддиро ошкор намуданд.Тавре, ки аз маркази матбуоти ВКД хабар медиҳанд, аз ҷониби кормандони ВКД дар ҳудуди деҳаи Андароби ноҳияи Ишкошим, дар лаби дарёи Панҷ, як халтаи полиэтиленӣ, ки дар дохилаш 18 кг 955 грамм маводи нашъадори навъи ҳашиш дошт, дарёфт ва мусодира карда шуд. Барои муайян кардани соҳиби маводи мазкур чорабиниҳои фаврӣ-ҷустуҷӯӣ идома доранд.Ҳамчунин зимни гузаронидани чорабиниҳои фаврӣ-ҷустуҷӯӣ дар дидбонгоҳи деҳаи Бӯстони ноҳияи Файзобод, шаҳрванд Бахтовар Халилов, соли таваллудаш 1995, сокини ноҳияи Рудакӣ бо гумони даст доштан ба муомилоти ғайриқонунии маводи мухаддир дастгир шуд. Дар вақти кофтукови шахсӣ аз дохили борхалтаи варзишиаш 718 грамм маводи нашъадори навъи ҳашиш дарёфт ва мусодира карда шуд. Нисбати ҳодисаи мазкур парвандаи ҷиноӣ оғоз гардида, тафтиши пешакӣ идома дорад.