Дасти дуои модар

Душанбе, 7.03.2014. (АМИТ «Ховар», Раъно Нусратуллозода).- Шурӯъ аз соли 2009 дар қаламрави кишварамон Рӯзи 8 март ҳамчун Рӯзи Модар таҷлил мешавад. Ҳар сол ин ҷашн бо шукӯҳу шаҳомати хосса таҷлил мегардад. Зан-Модар олиҳаест, ки нуру зиёи олам ва гармии зиндагӣ аз ӯст. Ҳамасола дар ин рӯз дар тамоми муассисаҳо ва кохҳои фарҳангии кишвар бахшида ба Рӯзи Модар чорабиниҳои фарҳангӣ доир мегарданд. Вобаста ба ин имрӯз дар Кохи Ҷомӣ таҳти унвони «Дасти дуои модар» чорабинии фарҳангӣ доир мегардад. Чорабинии мазкур бо ибтикори Кумитаи кор бо занон ва оилаи назди Ҳукумати Ҷумҳурии Тоҷикистон барпо мешавад. Дар он занони фаъоли вазорату идораҳои ҷумҳурӣ иштирок менамоянд. Дар назар аст, ки дар ин чорабинӣ барои болидагии хотири занон консерти идона намоиш дода мешавад.