Дуздҳо дастгир шуданд

Душанбе, 31.03 2014. (АМИТ «Ховар», Муқаддас Темурзода).- Кормандони милитсия 3 нафар сокини шаҳри Кӯлобро бо гумони даст доштан дар ҷинояти дуздӣ дастгир намуданд.  
Тибқи иттилои маркази матбуоти ВКД, ба шуъбаи корҳои дохилии шаҳри Кӯлоб шаҳрванд Файзигул Сафарова, соли таваллудаш 1965, сокини ҳамин шаҳр муроҷиат намудааст, ки шаби 22 ба 23 марти соли ҷорӣ шахсони номаълум бо тариқи пинҳонӣ вориди хонаи истиқоматиаш шуда, аз он ҷо 1 адад камераи наворбардорӣ, 1 адад мошини дарздӯзӣ, 2 адад ангуштарини тиллоӣ ва 1 адад балони газро, ки арзиши умумиашон 2700 сомониро ташкил медиҳад, дуздида аз ҷойи ҳодиса ғайб задаанд. 
Зимни гузаронидани чораҳои фаврӣ-ҷустуҷӯӣ, кормандони милитсия ҳамчун гумонбар дар ҳодисаи дуздии мазкур шаҳрвандон Меҳроҷ Салимов, соли таваллудаш 1994, Авзалшоҳи Намозалӣ ва Ҷаҳонгир Темуров, соли таваллудашон 1996, сокинони шаҳри Кӯлобро дастгир намуданд. Далели шайъӣ гирифта шуд.
Нисбат ба ҳодисаи мазкур парвандаи ҷиноӣ оғоз гардида, тафтиши пешакӣ идома дорад.