Иртиботи телевизионӣ: ӯҳдадориҳои Тоҷикистон баъди воридшавӣ ба СУС

Душанбе, 14.03.2014. (АМИТ «Ховар»,  Кристина  Эрлих).- Бо  ибтикори дафтари САҲА дар  Тоҷикистон якҷоя  бо Вазорати  рушди иқтисод  ва  савдои  Тоҷикистон 18 ва  19  март дар  шаҳри  Душанбе конфронс дар  мавзӯи «Хидматрасонии  иртиботи  телевизионӣ ва ӯҳдадориҳои  Тоҷикистон  баъди  воридшавӣ  ба Созмони  Умумиҷаҳонии Савдо» баргузор  мегардад. 
 
Дар  конфронс коршиносони дохилию байналмилалӣ мавзӯъҳои онро аз  диди  худ муаррифӣ менамоянд. Дар  ҷараёни  ин  чорабинӣ ҳамчунин масоили марбут ба хидматрасониҳои  иртиботи  телевизионӣ ва ӯҳдадориҳои  Тоҷикистон баъди пайвастан ба Созмони  Умумиҷаҳонии  Савдо  мавриди муҳокима  қарор  мегиранд.
 
Дар  кори  конфронс роҳбари дафтари  САҲА дар  Тоҷикистон Сафир  Маркус Мюллер, муовини  вазири  рушди  иқтисод ва  савдои  ҶТ  Саидраҳмон  Назриев иштирок намуда,  раиси Иттиҳодияи хидматрасонии интернетии коршиносони  Тоҷикистон  Асомиддин Атоев  ва директори  иҷроияи Ҷамъияти кушодаи «Хома» Шаҳло  Акобирова, ҳамчунин  директори  генералии «Телерадиоком»- и Кумитаи  телевизион ва радиои  назди Ҳукумати  Тоҷикистон  Сӯҳроб  Алиев суханронӣ  мекунанд.