Кишти пистаи эронӣ дар Дарвоз
Дарвоз, 29.03.2014. (АМИТ «Ховар», Файз Мирасан).- Соҳибкори ҷамоати Нулванди ноҳияи Дарвоз Султон Қиронов дар майдони яку ним гектар боғи нав бунёд кард. Дар ин боғ қариб тамоми намудҳои дарахтонро дидан мумкин аст.
Имсол бори нахуст Султон Қиронов дар боғи худ тухми як навъи дарахт бо номи пистаи эрониро кишт карда, ҳоло баъди сабзиш дар замин мешинонад. Тарзи шинондан, парвариш ва нигоҳубини ин намуди дарахтро вай аз мутахассисони соҳаи боғдорӣ омӯхтааст.
Ба гуфтаи сардори бахши кишоварзии ин ноҳия Нурмамад Додов баъди шодоб гардидани дашти Роғак ва баланд гаштани ҳосилнокии замин акнун хар бошандаи ин деҳа кӯшиш мекунад ба деҳқонӣ машғул шавад. Ин мутахассиси ҷавон мегӯяд, ки агар деҳқонон мутобиқ ба талаботи меъёрҳои агросаноатӣ заминро кишт кунанд, ҳамасола то 12 ҳазор сомонӣ аз он даромад ба даст меоранд.
Дашти Роғак, ки замини васеи киштбоб дорад, чандин сол ба сабаби беобӣ бекор монда буд.Ҳоло тавассути васл кардани як қубури обгузар аз кишвари ҳамсояи Афғонистон замини он шодоб гашта, акнун деҳқонони ҷамоати мазкур имкон пайдо намуданд, дуввумбора бо иқтидори боз ҳам баландтар заминҳои ин даштро ба кор андозанд. Дар чанд соли охир лимупарварӣ низ дуввумбора барқарор шуда, ҳоло миқдори лимухонаҳо ба 12 адад расидааст.