Маркази миллии мухобиротӣ хатарҳоро пешгирӣ мекунад

Душанбе, 20.02 2014 (АМИТ «Ховар», Фарзонаи Давлат).- Дирӯз сафири Амрико дар Тоҷикистон Сюзан Эллиотт Маркази миллии хизматрасонии васоити мухобироти сохторҳои қудратии назди баталйони алоқаи неруҳои марзбонии кишварро ба истифода дод.
Тавре ки дар ин бора аз Сафорати ИМА дар Тоҷикистон хабар доданд,  маркази мазкур ба маблағи  3,6 миллион доллар бо дастгирии Сафорати ИМА тавассути барномаи Фармондеҳии марказии ИМА (CENTCOM) “Мубориза алайҳи қочоқи ғайриқонунии маводи мухаддир“сохта шудааст. Маркази номбаршуда аз ҷониби фармондеҳи қӯшунҳои сарҳадӣ генерал-лейтенант Раҷабалӣ Раҳмоналӣ қабул  шудааст. 
Гуфта мешавад, ки сафир Эллиотт дар суханрониаш дар маросими кушодашавии ин марказ иброз дошт, км иқтидори дар марказ андухта имкон медиҳад, ки шабакаҳои алоқаиТоҷикистон дар ҳолати корӣ нигоҳдорӣ шаванд.  Таҷҳизоти мазкур қобилияти Ҳукумати Тоҷикистонро дар масоили вокуниш ба ҳолатҳои фавқулода ва мубодилаи маълумот барои муайян ва пешгирӣ намудани хатарҳо дар марзҳо беҳтар хоҳад гардонид.