Мулоқоти Абдусалом Қурбонов бо Питер Микули

  Душанбе, 14.03.2014(АМИТ «Ховар», Кристина Эрлих). — Вазири молияи Ҷумҳурии Тоҷикистон Абдусалом Қурбонов бо Роҳбари  дафтари Швейтсария  оид ба ҳамкорӣ дар Тоҷикистон Питер Микули 13 март Созишномаи грантӣ доир ба лоиҳаҳои «Офият ва обтаъминкунии шаҳрҳои шимоли Тоҷикистон, марҳалаи 2» ва «Обтаъминкунӣ ва санитарияи шаҳри Хуҷанд, марҳалаи 3» — ро имзо намуданд. 
 
Тавре аз котиботи Вазорати молияи кишвар ба АМИТ «Ховар» иттилоъ доданд, мақсади лоиҳаи «Офият ва обтаъминкунии шаҳрҳои шимоли Тоҷикистон, марҳалаи 2» беҳтар намудани низоми обтаъминнамоии шаҳрҳои шимоли Тоҷикистон, аз он ҷумла шаҳрҳои Истаравшан ва Панҷакент ва ноҳияҳои Шаҳристон ва Зафарободи вилояти Суғд мебошад. Лоиҳаи «Обтаъминкунӣ ва санитарияи шаҳри Хуҷанд, марҳалаи 3»  маблағгузории барномаҳои сармоявиро  барои беҳтарсозии қубурҳои обгузар ва барқарор намудани иншоти тозакунанда дар шаҳри Хуҷандро дарбар мегирад.