Мусодираи ҳашиш дар Қайроққум

Душанбе, 12.03.2014. (АМИТ «Ховар», Лайло Тоирӣ).-  Шабонарӯзи гузашта кормандони Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Суғд аз муомилоти ғайриқонунӣ тақрибан се килограмм маводи нашъаоварро мусодира намуданд. Ҳангоми гузаронидани чорабиниҳои фаврию ҷустуҷӯӣ дар шаҳри Қайроққум як халтаи полиэтиленӣ бо се адад бастаи дорои маводи рангаш сабз мусодира шуд.
Зимни санҷиши пешакӣ кормандони фаврӣ муайян намуданд, ки маводи нашъаовар ба шаҳрванд П.Н. — сокини шаҳри Қайроққум тааллуқ дорад. Мувофиқи хулосаи экспертизаи судӣ маводи нашъаовари мусодирашуда ҳашиш буда, вазни он се килограммро ташкил менамояд.
Тавре ки аз хадамоти матбуоти агентӣ хабар доданд, дар айни ҳол парвандаи ҷиноӣ оғоз гардида, тафтиш идома дорад.