Мусодираи беш аз 15 кило маводи нашъадор

Душанбе, 24.03.2014. (АМИТ «Ховар», Лайло Тоирӣ).- Кормандони милитсия зимни гузаронидани чорабиниҳои фаврӣ-ҷустуҷӯӣ дар ҳудуди ноҳияи Восеъ шаҳрвандон: Шеравган Шарифов, сокини ноҳияи Восеъ, Рустам Назриев, сокини шаҳри Душанбе ва Бахтиёр Қурбонов, сокини ноҳияи Фархорро бо гумони даст доштан дар муомилоти ғайриқонунии маводи мухаддир дастгир намуданд. Дар вақти кофтуков аз сумкаи варзишии шаҳрванд Шарифов Шеравган 13 килою 764 грамм маводи сахттаъсири ҳероин дарёфт ва мусодира шуд. Тавре ки аз хадамоти матбуоти Вазорати корҳои дохилӣ иттилоъ доданд, ҳамчунин зимни як амалиёти дигар дар ҳудуди шаҳри Қурғонтеппа ҳангоми азназаргузаронии мошини шахсии сокини шаҳри Кӯлоб, Ҳаётов Саидкарим, тамғаи «Опел-Астра», 1 килою 377 грамм маводи нашъадори навъи ҳашиш мусодира шуд.Дар маҷмӯъ маводи нашъадори мусодирашуда 15 килою 141 граммро ташкил медиҳанд. Нисбат ба ҳодисаҳои мазкур парвандаи ҷиноӣ оғоз гардида, тафтиш идома дорад.