Нимпайкараи ходими давлатӣ дар Темурмалик

Душанбе, 28.03.2014. (АМИТ «Ховар», Раъно Нусратуллозода).-Бахшида ба иди байналмилалии Наврӯз дар деҳаи Қиблаии ноҳияи Темурмалик маросими номгузории ҷамоати деҳот ба номи Лақай Қармишев ва пардабардорӣ аз рӯи нимпайкараи он баргузор гардид. Дар ҷамъомад раиси ноҳияи Темурмалик Мирзохон Сангов, масъулини ҳукумати вилояти Хатлон ва пайвандони Л. Қармишев сухан гуфта, зикр намуданд, ки ӯ ҳамчун ходими намоёни давлатӣ ва ҷамъиятӣ дар ободонии кишвар саҳми арзанда гузоштааст. Лақай Қармишев фаъолияти меҳнатии худро соли 1945 ба сифати омӯзгор дар деҳаи Гулбулоқ оғоз намуда, то ба вазифаи ҷонишини раиси Президиуми Совети Олии РСС Тоҷикистон, раиси Кумитаи назорати халқии РСС Тоҷикистон расидааст. Дар чорабинии наврӯзии деҳаи Қиблаӣ бинои Маркази саломатӣ ва китобхона ба истифода дода шуд. Инчунин ҳунархои миллӣ ва дастовардҳои меҳнатии сокинони ҷамоати деҳоти мазкур ба намоиш гузошта шуда, бозиҳои варзишӣ баргузор гардиданд.