Олимпиадаи ҷумҳуриявии Ҷоми АИТ миёни донишҷуён

 
Душанбе, 13.03.2014 (АМИТ «Ховар», Фарзонаи Давлат).-Имрўз, дар Академияи илмҳои Ҷумҳурии Тоҷикистон (АИҶТ)  маросими кушодашавии даври дуюми нахуст олимпиадаи ҷумҳуриявӣ миёни донишҷўёни муассисаҳои таҳсилоти олии касбии ҷумҳурӣ, барои дарёфти «Ҷоми Академияи илмҳои Тоҷикистон»  баргузор гардид. 
Тавре ки дар ин бора аз АИТ хабар доданд, олимпиадаи мазкур бахшида ба 20-солагии Конститусия (Сарқонун)-и  Тоҷикистон бахшида шуда, дар он зиёда аз 200 нафар донишҷўён аз шаҳру ноҳияҳои кишвар, ки  ғолиби даври аввали озмун шуда буданд, иштирок доштанд. 
Олимпиадаи мазкур ду рўз идома ёфта, ҷамъбасти он ва эълони ғолибони озмун рўзи 14 марти соли равон эълон хоҳад шуд. Гуфта мешавад, ки ғолибони ҷойи якум, дуюм ва сеюми олимпиада  бо «Ҷоми Академияи илмҳои Тоҷикистон» ва диплому ифтихорномаҳои Академия қадрдонӣ гардида,  ҳамчунин бидуни супоридани имтиҳони дохилшавӣ роҳхат ба аспирантура ва магистратураи АИТ дода мешавад.
Ба иттилои манбаъ, мақсад аз баргузории чорабинии мазкур, пеш аз ҳама ин дарёфти донишҷўёни болаёқат ва ҷалб намудани онҳо ба корҳои илмӣ-тадқикотии Институтҳои Академияи илмҳои Тоҷикистон мебошад.