Пурқувват намудани иқтидори илмиву зеҳнии донишгоҳҳо
Душанбе, 11.03.2014. (АМИТ «Ховар», Раъно Нусратуллозода).- Дар Донишгоҳи давлатии Хуҷанд ба номи академик Бобоҷон Ғафуров мулоқоти муовини аввали вазири маориф ва илми Ҷумҳурии Тоҷикистон Раҳматулло Мирбобоев бо ҳайати профессорон, олимон ва ҷомеаи меҳнатии муассисаи таълимии мазкур доир гардид. Муовини ректори донишгоҳ Абдулфаттоҳ Раҳимов ҳадафи вохӯриро шиносоии наздик ва назорати иҷрои дастуру супоришҳои вазири маориф ва илми Ҷумҳурии Тоҷикистон Нуриддин Саидов маънидод намуд.Тавре ки аз Маркази иттилоот ва таҳлили раёсати донишгоҳ иттилоъ доданд, Раҳматулло Мирбобоев аз Раёсати донишгоҳ, садорати факултаҳо ва ашхоси мутасаддӣ даъват кард, ки ба ҷашни Наврӯзи Аҷам омодагии комил бинанд ва онро дар сатҳи баланд гузаронанд. Мавсуф роҷеъ ба пешбурди кори таълиму илм дахл намуда, аз ҷумла афзуд, ки ҳарчи зудтар бояд таъсиси марказҳои тестиро дар назди донишгоҳ роҳандозӣ кард ва минбаъд имтиҳонот ба тариқи тестии электронӣ сурат мегиранд. Шурӯъ аз соли нави хониши 2014-2015 тамоми факултаҳо бояд пурра ба низоми кредитӣ гузаранд. Тайёр намудани мутахассисони баланддараҷа, пурқувват намудани иқтидори илмиву зеҳнии донишгоҳ ба масоили муҳимтарин ва аввалиндараҷа бояд мубаддал гардад.