Рӯнамоии дастурамал барои муҳоҷирони меҳнатӣ

Душанбе, 18.03.2014. (АМИТ «Ховар», Раъно Нусратуллозода).-Имрӯз дар Донишгоҳи давлатии омӯзгории Тоҷикистон ба номи С.Айнӣ рӯнамоии дастурамали «Маҷмӯаи маводи байнифаннӣ барои шаҳрвандони Ҷумҳурии Тоҷикистон» доир гардид. Дар ҳамоиш сардори раёсати илм ва маорифи дастгоҳи иҷроияи Президенти ҷумҳурӣ Аҳмадҷон Мирсаидов, муовини аввали вазири маориф ва илм Раҳматулло Мирбобоев, муовини ректор оид ба корҳои илмии Донишгоҳи давлатии омӯзгории шаҳри Томски Федератсияи Русия Константин Осетрин, роҳбари намояндагии «Россотрудничество» дар Тоҷикистон Владислав Курнушко, намояндагони вазорату муассисаҳо иштирок намуданд.Ректори Донишгоҳи омӯзгорӣ Абдуҷаббор Раҳмонов оид ба моҳият ва зарурати дастурамали ҳидоятгар барои муҳоҷирони меҳнатӣ ирози ақида карда, зикр намуд, ки ин маҷмӯаро омӯзгорони Донишгоҳи давлатии омӯзгории Тоҷикистон ба номи С.Айнӣ, Донишгоҳи омӯзгории шаҳри Томски Русия ва Донишгоҳи технологии Тоҷикистон дар ҳаммуаллифӣ таълиф кардаанд. Муовини аввали вазири маориф ва илми мамлакат Раҳматулло Мирбобоев дар хусуси мушкилот ва роҳҳои ҳалли муҳоҷирати меҳнатӣ сухан гуфта, омодагардии чунин як дастурамалро падидаи нек ва саривақтӣ унвон кард. Дар ин бора ба АМИТ «Ховар» Бахтиёри Абдураҳим-котиби матбуоти Донишкадаи омӯзгорӣ иттилоъ дод.