«Раванди Истанбул» дар Кобул

Душанбе, 12.03. 2014. (АМИТ «Ховар», Муқаддас Темурзода).- Дар шаҳри Кобул бо ташаббуси сафорати Британияи кабир дар Афғонистон таҳти сарпарастии Вазорати корҳои хориҷии Ҷумҳурии Исломии Афғонистон иҷлосияи коршиносони кишварҳои иштирокчии “Раванди Истанбул” дар бахши мубориза бар зидди терроризм дар мавзӯи назорати қонунии истеҳсол ва паҳншавии маводи тарканда ва прекурсорҳо баргузор гардид.
Тавре ки сомонаи Агентии назорати маводи нашъаовари назди Президенти ҶТ хабар медиҳад, дар иҷлосия масъалаҳои табодули иттилоот байни коршиносони идораҳои ҳифзи ҳуқуқи кишварҳои “Раванди Истанбул”, васеъ намудани доираи ҳамоҳангсозии амалӣ байни Афғонистон, ҳамсоякишварҳои он ва шарикони минтақавӣ дар назди хатари умумӣ — терроризм, ифротгароӣ ва маводи нашъаовар баррасӣ гардиданд. 
Дар кори иҷлосия намояндагони Ҷумҳурии Мардумии Чин, Ҷумҳурии Исломии Покистон, Ҷумҳурии Ҳиндустон, Туркия, Қазоқистон, Озарбойҷон, Қирғизистон, Аморати муттаҳидаи араб, Федератсияи Русия, Ҷумҳурии Туркманистон, Тоҷикистон ва Ҷумҳурии Исломии Эрон иштирок намуданд. 
Бояд зикр намуд, ки Ҷумҳурии Тоҷикистонро дар иҷлосияи мазкур намояндагони вазоратҳои корҳои хориҷӣ ва дохилӣ, Агентии назорати маводи нашъаовари назди Президенти Ҷумҳурии Тоҷикистон намояндагӣ намуданд.