Рушди туризм дар кишвар

 Душанбе, 13.03.2014. (АМИТ «Ховар», Зарангези Латиф).- Фардо, 14- уми марти соли ҷорӣ  муовини  раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Руслан Шодиков бо донишҷўёни риштаи туризми Донишкадаи соҳибкорӣ ва хизмати Тоҷикистон  мулоқот мекунад. 
 Гуфта мешавад, ки мулоқот дар доираи татбиқи «Барномаи давлатии рушди туризм дар Ҷумҳурии Тоҷикистон дар давраи солҳои 2010-2014», инчунин бо мақсади  иҷрои Протоколи ҷаласаи XII-уми Шўрои машваратии назди Президенти мамлакат оид ба беҳтар намудани фазои сармоягузорӣ дар бахши сайёҳӣ аз 13 декабри соли 2013,  ба роҳ мондани ҷараёнҳои муосири омодасозии кадрҳои соҳаи туризм, баргузории  нишасту вохўрӣ ва семинарҳои омўзишӣ  бо муҳассилини муассисаҳои таълимие, ки кадрҳои соҳаи туризмро тайёр менамоянд,  дар давоми моҳҳои март-апрели соли равон ба нақша гирифта шудааст.
 Хадафи асосии мулоқот ҷалб намудан ва омодасозии кадрҳои соҳаи туризм, алалхусус роҳбаладҳо дар шароити кӯҳӣ дар макотиби сатҳи олӣ мебошад.