Сафари кории Сарвари давлат ба Хуросон

 Душанбе, 13.03.2014. (АМИТ «Ховар»).- Имрӯз бо иштироки Президенти кишвар Эмомалӣ Раҳмон дар мавзеи Қизилқалъаи ноҳияи Хуросони вилояти Хатлон ба бунёди боғи нав асос гузошта шуд, ки дар майдони беш аз 600 га доман паҳн хоҳад кард.
Сарвари давлат Эмомалӣ Раҳмон ба ин мавзеи васеи ноҳияи Хуросон, ки зиёда аз 20 сол бо сабаби аз кор мондани обкашҳои барқӣ аз истифодаи кишоварзӣ дур монда буданд, ташриф оварда, ба дили ҳазорон сокинони атрофи он шуълаи умед овард.
Дар мавзеи оғози боғи нав боғдорону ниҳолпарварон ва масъулони бахшҳои дигари соҳаи кишоварзии шаҳру ноҳияҳои вилояти Хатлон намоишгоҳ оростанд. Дар ин ҷо навниҳолҳои дарахтони гуногуни мевадиҳанда ва ороишию сояафкан, меваю сабзавоти тару тоза, хушк ва консервашуда дар маъраз буд.
Тавре зикр гардид, солҳои охир нишондодҳои рушди боғутокпарварӣ ва зироаткорӣ  дар вилояти Хатлон рӯй ба афзоиши босуръат доранд. Таъкид гардид, ки боғҳои анори шаҳри Норак ва ноҳияҳои Шӯрообод, Ҷиликул, Қумсангир ва Шаҳртусу Қубодиён бояд барқарор шуда, анорбоғҳои нав бо навъҳои содиротии он бунёд карда шаванд.
Дар посух ба таваҷҷуҳи Сарвари давлат Эмомалӣ Раҳмон ба вазъи мамнуъгоҳи Бешаи палангон, иттилоъ дода шуд, ки барқарорсозии муҳити экологӣ, набототу ҳайвонот ва парандагони он хуб ба роҳ монда шудааст. Ҳоло дар ин мавзеъ 285 сар гавазни бухорӣ зиндагӣ мекунанд ва шумораи мурғи даштӣ ва дигар парандагону ҳайвонот низ рӯй ба афзоиш овардааст.   
Зимни суҳбат бо мардум Сарвари давлат Эмомалӣ Раҳмон онҳоро ба истифодаи босамар аз ҳар ваҷаб замини корам, бунёди боғу токзори нав ва барқарорсозии боғоти кӯҳна, ривоҷ додани сабзавоткорӣ ва аз ин ҳисоб афзун кардани қудрати содиротии Тоҷикистон маслиҳатҳои муфид дод. Таъкид гардид, ки боғу токзор бояд, асосан дар заминҳои бекорхобида, партов ва талу теппаҳо бунёд карда шавад.
Бунёди боғи нави 600-гектара бо шинондани нахустин ниҳолҳо аз ҷониби Президенти кишвар Эмомалӣ Раҳмон ва пирони деҳқонию  боғпарварӣ оғоз ёфт. Тавре зикр гардид, аллакай ҳамин сол дар майдони беш аз 150 га ниҳолҳои гуногун шинонда мешавад ва 300 нафар соҳиби кор мегарданд. Дар сурати ба 600 га расидани майдони боғ дар он беш аз 1200 нафар соҳиби кор ва ризқи фарох хоҳанд шуд. Дар ин боғ, асосан навъҳои содиротии олу, зардолу, нок ва  ангур шинонда мешаванд.
Мардуми деҳоти атрофи ин мавзеъ аз иқдоми бунёди ин боғ ва аз нав ободу зебо гардидани ин заминҳо басо шоду сипосгузоранд. Тавре зикр гардид, тайи беш аз 20 соли беобӣ қисмате аз аҳолии ин деҳот аз ин ҷо кӯч баста ба дигар ҷойҳо ҳиҷрат кардаанд. Акнун, ки ин мавзеъ аз нав обод мешавад, тамоюли кӯч бастани мардуми атрофи он хотима меёбад ва баръакс аҳолии он рӯ ба афзоиши бештар хоҳад овард.
Дар ин бора ба АМИТ “Ховар” аз Хадамоти матбуоти Президенти Ҷумҳурии Тоҷикистон иттилоъ доданд.