Сайқали дониши ҳарбии афсарон

Душанбе, 5.03.2014. (АМИТ «Ховар», Лайло Тоирӣ).- Тибқи нақшаи чорабиниҳои Ситоди генералии Қувваҳои Мусаллаҳ ҳафтаи гузашта дар Донишкадаи ҳарбии Вазорати мудофиа курсҳои омӯзишии сафарбарӣ доир шуданд, ки дар он афсарони комиссариатҳои ҳарбии вилоятҳо, шаҳру ноҳияҳо, ёрдамчиёни сардорони ситоди навъи Қувваҳои Мусаллаҳ ва дигар вазорату сохторҳое, ки тибқи қонун дар онҳо хизмати ҳарбӣ пешбинӣ шудааст, иштирок намуданд. Масъулин марҳалаҳои омӯзишӣ, соатҳои дарсӣ, номгӯйи мавзӯъҳо ва дигар паҳлӯҳои тайёрии сафарбариро мушаххас намуда, ҳамзамон ҳуҷҷатҳои роҳбарикунанда, тартиби тайёр намудани нақшаи захираҳои эҳтиётӣ, вазифаҳои сохторҳои комиссариатҳои ҳарбӣ ва дигар мавзӯъҳои муҳимро мавриди омӯзиш қарор доданд.
Ташкили ин қабил курсҳои муҳими омӯзишӣ бо мақсади боз ҳам баланд бардоштани донишҳои ҳарбӣ-сиёсӣ ва корбарии роҳу усулҳои зарурӣ дар фаъолияти ҳамарӯзаи онҳо мебошад, ки ин кор пайваста дар муассисаҳои таълимӣ ва дигар қисму воҳидҳои ҳарбии Вазорати мудофиа ба роҳ монда мешавад.