Тӯҳфаи наврӯзии Думаи давлатии ФР ба муҳоҷирони тоҷик

Душанбе, 27.03.2014. (АМИТ «Ховар», Марҳабои  Азамат).- 21  март Думаи давлатии Федератсияи  Русия  протоколи  ба Созишномаи  байниҳукуматии  Русияю  Тоҷикистон   ворид  намудани  ислоҳотро   тасдиқ  намуд. Дар  асоси  ин  протокол ба  шаҳрвандони  Тоҷикистон  иҷозат  дода  мешавад, ки  тайи  се  сол  дар  ҳудуди  Федератсияи  Русия кор  кунанд. Дар  ин  бора  намояндаи  расмии  Сафорати  Тоҷикистон  дар  Федератсияи  Русия  Муҳаммад Эгамзод  ба   АМИТ «Ховар» хабар  дод. 
 
«Алҳол  чунин  усули ҳамкорӣ  фақат байни  Тоҷикистону  Русия роҳандозӣ  шудааст. Қонуни  мазкур аз 21  марти  соли  ҷорӣ ба  мавқеи  иҷро  расид»,-  гуфт дипломати тоҷик.
 
Муҳаммад Эгамзод  зикр  намуд, ки  дар  ҷараёни   сафари расмии президенти  Русия  Владимир  Путин  ба  шаҳри  Душанбе моҳи  октябри  соли  2012  дар  бораи ворид  намудани  тағйироти  дахлдор ба  қонунҳои  ҳар  ду  кишвар аҳду паймон  шуда  ва он  моҳи  августи  соли  2013  дар  ҳошияи  ташрифи  ҷавобии сарвари кишварамон Эмомалӣ  Раҳмон  ба  шаҳри  Маскав  тасдиқ  гардид. 
 
«Аминам, ки аз ҷониби Думаи давлатии  Русия тасдиқ  гардидани  протоколи  зикршуда барои будубоши муҳоҷирони  меҳнатии  Тоҷикистон  дар  Русия   шароити  мусоид  фароҳам  оварда ва  ба  рушду таҳкими ҳамкории  байни ҳар  ду  кишвар  дар бахши  муҳоҷират   мусоидат  мекунад», —  гуфт  намояндаи Сафорати  ҶТ  дар  ФР.