Таҳкими муносиботи Тоҷикистону Эрон

 Душанбе, 18.03.2014. (АМИТ «Ховар», Мавҷуда Анварӣ). Дар идомаи сафари худ ба Ҷумҳурии Исломии Эрон 16 марти соли 2014 вазири корҳои хориҷии Ҷумҳурии Тоҷикистон Сироҷидин Аслов бо раиси Маҷлиси Шӯрои исломии Ҷумҳурии Исломии Эрон Алии Лориҷонӣ мулоқот намуд.
 Дар мулоқоти мазкур таъкид гардид, ки муносибатҳои дуҷонибаи Ҷумҳурии Тоҷикистон ва Ҷумҳурии Исломии Эрон намунаи барҷастаи дӯстӣ, ҳамкорӣ ва ҳусни тафоҳум байни ду кишваранд. Аз замони барпо гардидани муносибатҳои дипломатӣ ҳамкории ду кишвар ба болотарин сатҳ расида, заминаҳои гуногунро фаро гирифт. Зикр шуд, ки муносибатҳои байнипарлумонӣ низ байни ду кишвар бо муваффақият густариш меёбанд. Дар ин самт гурӯҳҳои дӯстӣ, ки дар парлумонҳои ду кишвар таъсис ёфтаанд, саҳми арзанда мегузоранд. 
 Ҷонибҳо бо изҳори ризоят аз сатҳи ҳамкорӣ дар заминаҳои гуногун зикр намуданд, ки дар оянда низ ният доранд, лоиҳаҳои муштараки дигарро, ки ба суди на танҳо ду кишвар, балки минтақа низ мебошанд, амалӣ созанд.